Je tiu horo restis nur tri el la ses infanetoj registritaj je la Hejma Infan-Vartejo de S-ino Zulma. Natalia tiun tagon jam estis vizitinta la kvin aliajn de cxi tiu sektoro kaj pli ol duon-dekduo en sektoroj unu kaj du. Sxi cxie ripetis la samajn amikajn frapetojn sur la vangoj de unu kaj la kapo de aliu, dum sxi pridemandis vartistinojn kaj helpantinojn, centfoje klopodante preterlasigi etajn privatajn malbonfartojn aux novajxojn pri familianoj de Bahia... Kiel cxefagento de la Sociala Komunumo-Komisiono, !i devis skolti multe pli ol inspekti dum siaj surlokaj rundoj, intence neregulaj, tamen suficxe oftaj por ke tiuj dommastrinoj sentu sin malfremde antaux sxi.

Klerigan kaj instruan rolon cxe la logxantaro oni rezervis al pastroj, pedagogoj, socialaj agentoj, en preskaux cxiusemajnaj kunvenoj kun la komunumanoj. Natalia respondecis pri la kunordigado de la tuta reto de aktivecoj en la fako pri vartado kaj virina agado, ekde la liverado de proviantoj, medikamentoj kaj urgxaj bezonajxoj, gxis la orientado de gvidantoj kaj distribuado de ties taskoj. Sxi preferis kontroli persone kiel statis en la praktiko la funkciado de la sistemo: Sxi ja tro nete konsciis pri la relativa valoro de raportoj ; !i mem iom post iom estis specialigxinta pri raporto-redaktado: po unu cxiumonate sxi prezentis al cxiuj sxtataj kaj privataj instancoj, kiuj estis fulme konstruintaj la novan urbon kaj kiuj dauxre subtenis la Komisionon de post 1984, kiam eksplodis tra la mondo la skandalo pri la vivkondicxoj en la superpoluciita Kubatao, la Kubatao de la infanoj, kiuj naskigxis sen cerbo.

“Virgulino plejsankta! Vi ja venas en bona tago, Natalia. La bando denove pafadis en la drinkejo de mia Souza... Ha, vi jam scias. Mi diris al vi, ni bezonas noktogardistojn! Tiuj policistoj venas mem drinki cxe ni, sed vaporigxas cxiufoje kiam oni riskas perdi sian vivon en la manoj de huliganoj!... Kion diras vi? Ha, jes, certe, la diareo malpligravigxis, tiuj medikamentoj efikas bone sur niajn karajn idojn, cxu ne, angxeletoj? Vidu, Natalia, estas simple: se la stratoj estus pli lumitaj...”