ARTOJ kaj ESPERANTO
DU JAPANINOJ VIZITIS LA DOMON KAJ ĜARDENOJN DE MONET

Gigi kaj Gérard Sénécal plurfoje vizitis Japanion kaj antaŭ kelkaj jaroj tien organizis plursemajnan vojaĝon kun klubanoj el Hérouville. Konsekvence kreiĝis fortaj amikaj rilatoj kaj reciprokaj gastigadoj kiujn kelkfoje raportis nia bulteno. Pasintan someron, Gigi kaj Gérard gastigis du japaninojn, FUJIMOTO Hideko kaj SAIKI Masayo. Michelle Paumier kaj Jean-Pierre Sauvage, iun tagon, akompanis ilin ĝis Giverny por viziti la ĝardenon kaj domon de Claude

Monet.
Hideko kaj Masayo ege ĝuis tiun viziton ĉar la pentraĵoj de Monet tre famas en Japanio. La artisto vivis dum 43 jaroj en la domo de Giverny. Li grandigis ĝin por akcepti sian grandan familion, multajn gastojn kaj dungitaron. Vizitindas la garbejo-ateliero, la
« Blua salono » kun de li kolektitaj japanaj stampbildoj, la nutraĵejo kun bambuaj mebloj

en tiama furora japaneska stilo, la blufarba kuirejo kun kahelaroj de Rouen, la dormoĉambro kie Monet mortis la 5an de decembro 1 926.
Michelle Paumier, tre sperta priarta ĉiĉerono, riĉigis la viziton per multaj
informoj pri la artisto kaj liaj verkoj dum la vizito de la tutmonde konataj

ĝardenoj. La flora ĝardeno « Clos Normand » dividiĝas en bedoj kies floraj masivoj kreas buntajn kaj diversaltajn volumojn. La « Akva Ĝardeno », japane inspirita, kaptis la atenton de Hideko kaj Masayo. Monet imitis la japanajn ĝardenojn danke al multaj stampbildoj. Li ornamis la akvon per nufaroj kaj nimfeoj kaj ĉarma ponteto sur kiu li ofte restadis por pentri. Oni nombras 45 versiojn de la Japana Ponto kaj la Nimfeojn en Orangerie ricevas de multaj jaroj senĉesan sukceson.

Jen bela promenadcelo kun viaj eksterlandaj amikoj.
fotoj de M.Paumier Jean-Pierre inter Hideko kaj Masayo